काठमाडौं । राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले कर्णालीमा भएको बस दुर्घटनापछि उद्धार कार्य प्रभावकारी हुन नसकेको भन्दै सरकारको चर्को आलोचना गरेका छन्।सोमबार बसेको प्रतिनिधिसभा बैठकमा बोल्दै सांसद शाहीले कर्णालीमा भएको दुर्घटनाले सरकारको गैरजिम्मेवारी र असफलता उजागर गरेको बताएका हुन्।उनले असार १८ गते कर्णाली नदीमा बस खस्दा यात्रुहरू नदीको बीचमा फसेर जीवन बचाइदिन हारगुहार गरिरहेको अवस्थामा पनि समयमै उद्धार हुन नसकेको बताए।सांसद शाहीले दुर्घटनास्थलमा एक व्यक्ति भीरमा अड्किएर बाँच्न संघर्ष गरिरहेको भए पनि उद्धार ढिलो हुँदा ज्यान जोगाउन नसकिएको उल्लेख गरे।उनले दुर्घटनाको समयमा आकाशमा हेलिकप्टर देखिए पनि त्यो उद्धारका लागि नभई मन्त्रीको सवारीका लागि प्रयोग गरिएको दाबी गरे।शाहीका अनुसार उद्धार टोलीसँग आवश्यक साधनको अभाव थियो भने सुर्खेतबाट घटनास्थलमा उद्धारका लागि हेलिकप्टर पठाउन नसक्नु सरकारको गम्भीर कमजोरी हो।‘मैले तत्काल फोन गरेको थिएँ। उद्धार टोलीसँग आवश्यक साधन थिएन। सुर्खेतबाट घटनास्थलमा जानका लागि एउटा हेलिकप्टर पठाउने क्षमता पनि सरकारसँग थिएन,’ उनले भने। सांसद शाहीले कर्णालीका नागरिकमाथि विभेद भइरहेको आरोप लगाउँदै कर्णाली पनि नेपालको अभिन्न अंग भएकाले राज्यले समान व्यवहार गर्नुपर्ने बताए।